Vastelaovesgezelschap "de Kwas" organiseert same met Mèziekvereiniging "Valuas" de iërste edisie van ut vreej toegankelikke Galderbal.
Maonde van veurbereidinge zörge d'r veur det de bezeukers zich op 12 november waane in ut alde Patroonaatje (taegewoordig Feeszaal ut Tref). D'n tiëd schient heej stil te hebbe gestaon. D'n oétbater is terech bliej det ut gekaevel tösse "Valuas" en "de Kwas" tot ein compromis haet geleid.
Ut Galderbal zal genne doëdnormale balaovend waere. Van alle kante in de zaal waere de bezeukers getrakteerd op zang, mèziek en toniël. Ze make ut tot stand komme van ut Galderbal van doeënbeej mei.
Vastelaovesgezelschap "de Kwas" zal aafscheid neme van Prins Bart I met zien adjudante Loek en Daniël. Zeej hebbe ut aafgelaupe vastelaovesseizoen op ein veurtreffelikke wiès de vastelaovesker in Venlo-zuid getrokke. Nog ein kièr make zeej eur opwachting in vol ornaat um nao ut Aaftraeje weer as gewoëne börgers door ut laeve te gaon en vaerder te geneete van wat ut Galderbal nog miër te beeje haet.
Mèziekvereiniging "Valuas" zal in eur grande setting de aovend opluustere met bekinde nummers van pop wiès vastelaovend en ontvingk speciale gaste wie Ron Barents en Peter Jansen en Wim Janssen.
De stum van Ron Barents zal meinig vrouwehert sneller doon slaon. Hae is bekind van rolle in de musicals "Titanic", "Elisabeth" en "Miss Saigon". Vaerder is hae leadzenger van coverbend "Marble" en is hae dökker te zeen en te huure beej "Musical Friends in Concert".
Peter Jansen en Wim Janssen zien eigelik gestop met optreeje maar wille veur ut Galderbal gaer ein echte "comeback" make. Bekind van de vastelaovesschlagers "Ein maedje oét Tegele", "Wao laot ik noow die träöt?", "Wies heej!" en "Jao, waat duisse dan?" welke allemaol op ein van de Jocus cd's verscheene. Met ut nummer "Deh dan dao isse" behaolde zeej zelfs provinciaal sukses door ut LVK met dit nummer te winne.
Taeves zulle de Venlokryner tièdes ut Galderbal optreeje. Zeej make ein onvervals stökske dialek mèziek euvergaote met ein polka suiske en veurzeen van ein pittig Kryner tempo. De veer hiëre en dreej dames zulle "ut Patronaatje" duchtig laote swinge met eur aanstaekelikke mèziek.
As aafsloéting van de aovend zal Feesbend Pats! optreeje. Zeej speule echte feestnummers, bekinde dialeknummers en Duitse schlagers. Met nummers van d'n Discodens wiès Schenk mir dein Herz zulle zeej ut Patronaatje laote bibbere op zien alde grondveste.
Ut Galderbal begint um klokslaag 20:00 oor en vindt plaats in Feeszaal "ut Tref" aan de Hendrikstraot in Venlo-zuid. Toegank is gehiél gratis! In verband met de verwachte drökte is ut winselik um veur 20:00 oor aanwezig te zien.