Jeug van de Kwas

Hé dich dao! Tóf detse kumps kièke op ózze thoèspagina.

Ónder ut köpke jeug vindste nog mièr informatie euver ós.

Wae zien weej?

In 2002 woort d'r ónderzóch of d'r waat mièr beteikend kós waere veur de jeug oèt Venlo-Zuid. Inkele ideeje kwame op taofel en al gauw bleek det d'r waal animo waas um waat mièr te doon met de jeugvastelaovend, zoeëdet ut neet nao ut Spruutjesbal gedaon waas.

Inkele jeugdige vreejwilligers oèt Zuid startte in 2003, same met inkele Kwasteleeje, met ut organisere van 'ne jeugmiddaag. D'r kwaam vanalles beej kièke um dae middaag van de grónd te kriège. Zoeë woort d’r driftig nao artieste en joekskapelle gezóch en d'r woorte zelfs posters gemak. Ouk leech en geluud woort door de jeug zelf geregeld.
Ut lökde eur um dae middaag op de plenk te kriège. Waat ware ze grueëts nao dae ièrste jeugmiddaag!

Dit sukses bleek nao mièr te smake en dus woort beslaote um vanaaf ut vastelaovesseizoen 2003-2004 met ein trio, raod van elf, tanzmeriekes, vors en sirremoniemeister ut begin te make van de Jeug van De Kwas. De Kwas zelf stond d’r ouk volledig achter en steunde de blage met eur ervaring. Vuuël werk meus d’r verrich waere. Gelökkig ware d’r elders die auk ein helpende hand oèt stoke. Zoeë woorte d’r pekskes veur de dansmarietjes en gilletjes veur de Raod van Elf gemak.



Waat waas ut spannend det ièrste, echte, jaor um die vastelaovesbühn op te gaon. D'r ware d'r beej die stónde stièf van de zenuwe beej ut oètkómme van ut ièrste jeugtrio in eine volle Kwastetempel gevöld met jeug oèt Venlo-Zuid.

Same wuuërt d’r idder jaor gewerk aan ein niej jeugbal veur en door de jeug oèt zuid. De letste jaore ónder de naam Mini-pallesaotebal.

Vanaaf ut seizoen 2013-2014 is d'r zelfs weer ein minigarde ópgerich.

Um met de jeug in Venlo-Zuid vastelaovend te viere, steit beej De Kwas hoeëg in ut vaandel en weej met de Jeug van De Kwas zulle dao ein beejdrage aan bliève levere. Al haet de jeug van taegewaordig vueël andere dinger te doon, toch bliève we haope det de kultuur van de vastelaovend blief bestaon. En det d’r nog steeds blage zien, die de vastelaovend met de paplaepel hebbe binne gekrege en met ós vastelaovend viere.

Vastelaovend in Venlo-Zuid veur de jeug, door de jeug.

Veur mièr informatie kinse kóntak opneme met de veurzitter van de Jeug van De Kwas: 

John Jacobs                                                           
0620975069

info@dekwas.nl

V.G. De Kwas aafdeiling Jeug
Hendrikxstraot 17
5912 BW Venlo