As Artiestekemissie zien weej bliej, det weej van de redaksie de gelaegenheid hebbe gekrege um ôs aan ôg veur te stelle.
Zoëas de naam van de kemissie al zaet, halde weej ôs bezig met ut selectere, côntractere en begeleide van de artieste. Al wiéd van te veure vergadere weej euver wae weej op de zittinge laote optraeje. Os werkterrein besleit neet allein de zittinge veur ut aaftraeje en ut bekindmake van ut nieje trio, maar auk de Bejäördezitting in Sinselhaof en ut zörge veur muzikale opluustering van de resepsie, Krantprissentasie en Moëdesjow huure d'r beej.
Beej bepaolde bekinde artieste neme weej sôms al ein paar jaor van te veure kôntak op. Aaf en toe kiéke weej auk op zittinge van zustervereiniginge in de keuke van eur joekskemissie um zoëvuul meugelik weer nieje artieste te bringe. As weej ein keus hebbe gemak, make weej tillefonies met de artieste aafspraoke euver eur optraeje en probere veur iddere zitting eine gooje mix te make tösse zang, parodie en buuts.
Ut blief dan netuurlik altiéd aafwachte of eine arties beej De Kwas auk good oét de verf kump. Gelökkig lök det meistal waal. Weej haope auk in de toekoms nog miër fantastiese prônkzittinge te kinne organisere.