Kleier Kemissie

De kleierkemissie zörg d'r veur det Vors, Sirremoniemeister en Raod van Elf altièd good in ut pak zitte en good gemuts zien. Ouk druùg dees kemmissie d'r zörg veur det ut Trio d'r altièd piekfijn op steit. Det wilt zegge ein net pak, ein moeëje muts, haemde, hase, strikske en pochetje en netuurlik mantels en scepters. Ut innigste wao dees minse (ut trio) dus zelf veur mótte zörge is óndergood, sök en schoon.

De mantels veur ut Trio waere um de paar jaor vervange en de mutse idder jaor. De mutse en pakke van de Raod van Elf gaon gelökkig waat langer mei. Mit de mutse perbere weej altièd elf jaor te doon. Mit de zwarte pakke van de hière is det gen haolbare kaart. Dees zien beslis ièrder aan vervanging toe. Dao wao ut Trio gans door ós gezelschap wuurt aangekleid, verwachte weej det de hière van de Raod zelf eine duit in ut zekske doon. Heejveur spare zeej idder jaor ein bepaold bedraag. Veur die pöpkes kinne zeej dus jaomer genóg gen kleppe koupe.

Netuurlik hebbe weej ouk aandach veur ós Tanzmeriekes. Oètintelijk vorme zeej ut visitekaertje van ós gezelschap en dene zeej d'r dan ouk oèt te zeen um door ein ringske te haole. Tièdes ut vastelaovesseizoen zörg de kleierkemmissie d'r altièd veur det mantels, mutse en vere op tièd dao zien wao ouk ós dreejspan is. Nao ut seizoen is d'r weer tièd um alles good nao te kièke. Noeëdzakelikke reparaties waere verrich, smeis waere dinger vervange en alles wuurt tösse de mótteballe opgeborge in d'n alde kleierkas.

Zoeë as geej dus zult begrièpe, is de kleierkemmissie bekans ut ganse jaor door aktief. Vastelaovesgezelschap De Kwas meug zich laote zeen!

Veurzitter van de kleierkemissie is d'n hièr Hay Titulaer.