HISTORIE DE KWAS

Auteur: Ger Piëters
Aangevöld: Guus Truijen

Al vruug in 't bestaon van jôngere gemeinschap Stella Duce woord de iërste aanzet gedaon tot 't viere van de vastelaovend. Al in het jaor 1950, twië jaor nao de oprichting van de vereiniging, woorte de leeje opgeroope um op vastelaovesmaondaag verkleid naor 't Patronaat te kômme. Er woorte priéze beschikbaar gesteld veur de leuks verkleidde en d'r woorte -auk in de jaore d'r nao - speurtochte georganiseerd en diverse films vertoënd. Men zoel kinne zegge det toen al de iërste aanzet gegaeve woord veur de now waalbekinde moëdesjow op maondaagmorge van Vastelaovesgezelschap de Kwas, ofschoën deze toendertiéd eksklusief veur de misdeeners en aanhang waas.

In 1955 waas d'n oom van Paul Naus ônder de naam Zjaen I prins beej ut Venlose Vastelaovesgezelschap Jocus. Aan um woord gevraog um op maondaagmorge ut Vastelaovesgebeure beej Stella Duce met ein bezeuk te willen veriére. Dit verzeuk woord ziër op priés gesteld, auk al umdet ut nog noeit iërder waas veurgekômme det eine Prins van Jocus zich boéte ut centrum van Venlo aan de jeug kôs presentere.

Det auk de jeug toen al det gebaar wis te waardere maag waal bliéke oét ut feit, det dees bezeukskes op maondaagmorge van meet af aan in de groëte zaal van "ut Patronaat", later "ut Tref" hebbe plaatsgevônde.
Beej ut welkômswäördje in 1955 is euveriges -vôlgens een ziër betrouwbare brôn- veur het iërs in de geschiedenis de naam "Venlo-Zuid" gevallen.
Zoëas beej ein gooje tradisie gebroékelik, woord auk deze inkele kiëre ônderbraoke, maar det det al direk ut jaor d'r nao ut geval zoel zién, waas toch waal uniek. Door de ziër strenge vorst in ut jaor 1956 en de gebrekkige verwerming van ut Patronaat, waas op vastelaovesmaondaag de komplete waterveurzening en -aafveur bevraore en kôs ut twiëde bezeuk van de stadsprins genne doorgank vinde Nao 10 jaor flink vastelaovend gevierd te hebbe ônder de paraplu van Jocus woord in 1959/1960 steeds miër de behoefte geveuld aan weer iets unieks veur Venlo: ut oétroope van eine eige jeugprins veur Stella Duce en netuurlijk auk veur de euverige jeug van "Zuid".
Dees iër veel in 1960 te beurt aan Joep Jongen, gesecondeerd door zien twië adjudante Jan Christis en Huub Bisschops.
Heejveur woord auk ut fenomeen "zitting" in de ganse viering opgenaome en zelfs de resepsie veur ut trio -aanvankelijk op vastelaoveszôndaag in de baovezaal- woord toen in ut laeve geroope. Vandaag d'n daag is de prinseresepsie van de Kwas op de vriédaag veur de vastelaovend, ein waalbekind gebeure in gans Venlo en veur vuul vastelaoves-vereniginge en dito-vierders ut begin van de "Vastelaoveszesdaagse".
Waas ut de vors welke in 1956 eine streep door de vastelaovesviering haolde, in 1961 en 1962 was ut de beurt aan pastoër Seelen, welke op las van d'n Bisschop van Remund de vastelaovesviering in gebouwe van ut Bisdom verbaoj. Van de noëd woord echter snel ein deug gemak en Stella Duce vierde in 1962 en 1963 vastelaovend in "Huize Lataste", behuurend beej ut kloëster Bethanië op de Kaldenkerkerwaeg.

Nao 1963 woord alles weer truukverplaats naor ut eige patronaat en volgde de prinse mekaar regelmaotig jaor nao jaor op. Dit alles gebeurde ônder de bezielende leiding van de inmiddels in ut laeve geroope "Carnavalscommissie" -auk waal kort C.C. geneump- welke zich met vuul verve inzoot um veurnamelik de zittinge tot ein vreej uniek gebeure te make.
Artieste woorte van heinde en verre aangetrokke en auk ut oétroope en aftraeje van de Prinse woord tot in de puntjes geregeld en dök  van ein passend motto veurzeen.
In feite is dees C.C. de veurbode gewaes veur ut huidige Vastelaovesgezelschap "de Kwas", temiër auk, umdet vanaaf ca. 1970 de naam "de Kwas" -oorsprônkelik gegaeven aan de vastelaovesedisie van clubblaad "de Gong"- steeds miër naor boéte toe woord oétgedrage.
Euveriges woord in 1971 ut iërste echt gedrökte exemplaar van "de Kwas" in ut laeve geroope op de pers van drökkerie van Spijk. In 1974 woord de iërste twië-kleuredrök gerealiseerd bij drökkerie Pennaerts en inkele jaore later woord wederom gekaoze veur van Spijk, waor vandaag d'n daag ein prachtig exemplaar in miër-kleuredrök en in ein oplage van bijna 5000 stöks gedrök wuurd.
Dit respectabele aantal wuurdt door de leeje van ut gezelschap veur niks hoés-aan-hoés in Venlo-Zuid verspreid.

Toen in 1974 auk de andere activiteite van Stella Duce zoëas de wandelclub, d'n drumband, de gymnastiekclub en de hobbyclub ein gigantische greuj hadde door-gemak, door ut aantrekke van auk neet-misdienaars as lid, woord de vereiniging umgevormp tot ein Jôngeregemeinschap en woord "de Kwas" ein zelfstandige vereiniging.

D'r  woord gekaoze veur de structuur van ein ech vastelaovesgezelschap, eine groep enthousiastelinge ônder leiding van eine veurzitter. Oét eur midde woord eine vors en eine raod van elf gekaoze en vanaaf ut begin woord d'r vuul aandach bestaejd aan professionele kleier veur ut gezelschap.
Al snel  woorte veur de diverse werkzaamhede, kemissies gevormp, die idder ein eige ônderdeil van ut vastelaovesgebeure veur eur rekening noome. Auk woord d'r ein dageliks bestuur, bestaonde oét veurzitter, secretaris en penningmeister geformeerd. Bewus woord gekaoze veur ein loskoppeling van veurzitterschap en "vorstendôm".

De Dansgarde
Vanaaf 1970 beschikte De Kwas auk euver ein eige "Dansgarde". In de tachtiger jaore, op ut hoëgtepunt van eur bestaon, waare d'r prachtige danse te zeen. Mede dankzij eur instructrice mevr. Mia Mulders, die auk de kleurieke kleier zelf makde, greude de garde oét tot ein Dansgarde met ein ziër hoëg nivo, zoedet zeej auk beej andere vastelaoves vereiniging op de bühne kwame te staon.

D'n band met Stella Duce woord in de laup der jaore steeds losser maar bleef waal steeds merkbaar aanwezig, waat o.a. bleek in 1999, door -ôndanks ut golde jubileum- genne prins oét de geledere van Stella Duce te keeze vanwaege de organisasie van de Boérebroelof.

Financieel bedruip ut gezelschap zich gans oét eige middele, welke veur ein groët deil door zelfwerkzaamheid beej diverse gelaegenheden vergaard waere. Zoë waere o.a. vloëiemerrete georganiseerd, wuurd ald pepeer opgehaold, waere buffetdeenste verrich waor maar meugelik en in december wuurd d'r zelfs gekiend. De leeje draage beej in de koste van eure eige smoking, door jaorliks ein bepaald bedraag aan kleiergeld te betale en veur de jaorlikse feeshappening met ut ganse gezin wuurdt maondeliks een beejdrage gespaard.
De prinsegarde, welke lange tiéd ut visitekaertje van ut gezelschap waas en wao men auk ziër trots op waas is jaomer genôg ter ziele gegaon. Um verschillende raeje häökte ein aantal dames aaf en auk oét de toennog bestaonde mini-garde waas gen aanwas miër te kriége. Zelfs de mini-garde meus enige tiéd later waeges bloedarmoede eur activiteite staake.
Ein ander aspek waat beej de Kwas nog aan Stella Duce duit dinke, is de jaorliks truukkierende Vastelaovesmis op de zaoterdaag veur vastelaovend; ôntstaon tiédes ut prinselik regime van Martin I (Christis) in 1971 en exclusief veur de Kwas, greujde dit kerkelijk gebeure in de laup der jaore oét tot ein manifestasie waoraan alle 3(!) de gezelschappe welke zich met Venlo-Zuid verbônde veule eur meiwerking gaeve. In taegestelling tot met waat op andere plaatse gebeurt, is de kwaliteit van de misviering nog steeds greuiende, waat netuurlik neet op de letste plaats te danke is aan de sturende krach van ôzze pastoër Piëters.

Zoas al iërder gezag, wuurd d'r veur de vastelaovend idder jaor ein ander motto gekaoze. De technische kemissie mak nao dit motto prachtige zaalversieringe. Zeej hebbe heejveur de beschikking van eine zelf ingerichte hobbykelder, ônder ôs residensie "ut Tref"
Tenslotte velt nog as biezônder punt te vermelde, det twië ald-prinse van de Kwas nao precies 2 x 11 jaor ut prinsschap beej de Jocus op zich genaome hebbe, te weite: Dé I (Smets) in 1989 en Wim II (Roeffen) in 1995 en in 2003 woort ôzze ald-prins Peter II (Michels) adjudant beej ut Jocus-dreejspan.

In ut jubileumjaor 2003 ( 4x11 jaor De Kwas) mochte weej in sameweerking met de LVKA ein veurronde van de Limburgse Buuttekampioenschappe organisere. Vanaaf det jaor trek De Kwas met eine groëte groep deilnemers mei in de Venlose  optoch op vastelaoves maondaag.

Op zôndaag 8 fibberwarie 2004 haet Wim Brummans oét hand van d'n börgemeister de iérespeld in gold van de stad Venlo ôntvange!
Hae kreeg die veur zien vuule vreejwilligerswerk beej talloze vereiniginge.
En netuurlik veur zien werkzaamhede beej De Kwas.

Jeugaafdeiling
In 2003 zien weej beej De Kwas gestart mit ein jeugaafdeiling. Ein zelfstandige aafdeiling mit eure eige "Raod van Ellef", Vors Kwastius, en netuurlik eure eige Prins met twieë adjudante. Tiédens eine door eur zellef georganiseerde jeugmiddaag wuurd ut Trio oétgeroope. Ut ganse gezelschap geit auk op bezeuk beej de  jeugaafdeiling van de andere vastelaovesvereiniginge. Op vastelaoves zondaag trekke zeej mei met d'n optoch in de stad.

                                              Prins Lars waas de iërste jeugprins          


Zoëas geej zeet zien d'r de letste jaore flink wat nieje activiteite opgestart! Daorbeej meuge we zeker ut Pallesaotebal neet vergaete. Eine bal dae bol steit van de muziék, zang en joeks. De twiëjede edisie in 2008 waord gecombineerd met ut oétroope van de nieje hoégheid, prins Tuur d'n iërste.