Meuge weej ôs efkes veurstelle?
Weej zien Vastelaovesgezelschap "de Kwas"
Vastelaovesgezelschap De Kwas woort in 1959 opgerich en is daomei ut aldste buurtgerichte vastelaovesgezelschap van Venlo.
Zoëas idder zichzelf respekterend vastelaovesgezelschap betaamp, roope auk weej idder jaor eine Prins oét.....(met twië Adjudante)
Dae prins kump altiéd oét Venlo-Zuid en is in de regel emus dae zien spaore op ein of andere meneer verdeend haet, binne ut vereinigingslaeve.
Weej residere in kefee-feeszaal "ut Tref" aan de Hendrikxstraot, maar det is neet altiéd zoë gewaes.
In d'n tiéd det ut Patronaat nog van de kerk waas, woord d'r op ein gegaeve moment, door d'n Bisschop van Remund verbaoje um vastelaovesaktiviteite te organisere in gebouwe die van de kerk waare. Weej zien toen veur ein paar jaor oétgeweke naor ut Kloëster Bethanië, waor door de nônne meujlik opvoedbare maedjes in bedwang woorte gehalde.
Op ein gegaeve moment goof de kerk weer greun leech en sinds daen tièd zien weej neet mier weggewaes beej "ut Tref".
Waat doon weej zoeal:
Vastelaovesgezelschap "de Kwas" is momenteel ein good geoliede machine, waorbinne verschillende kemissies eur werk doon. Bekind zien de prachtige zaal- en bühneversieringen die de TC (technische kemissie) idder jaor weer oét d'n hood tovert.
De P&P (pers- en propaganda kemissie) zörg d'r idder jaor veur det alle minse in Venlo-Zuid veur niks eine perfek verzörgde Vastelaoveskrant in de bus kriège. Vaerder is dit neet ut enige wat P&P duit. Weej zörge dmv persberichte, posters, flyers en tv-spotjes det evenemente van "De Kwas" good ónder de aandach gebrach waere.
Det iddere zitting weer ein fees is kump op ut konto van de AC (Artieste Kemissie) en det zoewaal de raod van Ellef, de Dansmariekes en ut Prinselik trio d'r idder jaor weer perfek opstaon wuurd gans verzörg door de KC (kleier Kemissie).
Veur alles waat neet door de baovegeneumde kemissies wuurd opgeknap is de AZ (Kemissie Algemeine Zake) verantwaordelik.
Sinds 2003 trek Vastelaovesgezelschap De Kwas met eine groëte groep mei in de schoëne vastelaovesoptoch van Jocus. De toch waal omvangrieke organisasie heejvan is in hand van de OC, geej raojt ut al de Optoch Kemissie. En alle aktiviteite veur de jeug, waere netuurlik georganiseerd door de "Jeug van de Kwas"
Dan is d'r nog ein geheime kemissie; de PZK (Prinse Zeuk Kemissie). Zeej zörge d'r veur det d'r idder jaor in ut deepste geheim eine prins en adjudante waere oétgezôch en det zeej dreej waeke veur de vastelaovend aan ut publiek waere veurgesteld.
Ôs programma:
Weej zien neet allein in de vastelaovestiéd. maar ut ganse jaor in de weer. De totale organisasie kôs vuul geld en is met allein contribusies en donasies neet te betale. Daorum môt dao hard gekraos waere! Zoë organisere weej jaorliks kienaovonde, haole weej maondeliks ald pepeer op in de wièk "Vinkeböske" e.o. en "verheure" weej ôs wao meugelik veur barwerkzaamhede tièdes groëte festiviteite. Weej bringe auk de wièkkrant rond in Venlo-Zuid.
Ós doel is allich de aanloup naor de vastelaovend en de dreej dolle daag zelf. Op d'n elefde van d'n elefde neme weej met alle vastelaovesgezelschappe van stadsdeil Venlo deil aan ut inscheete van ein niej vastelaoves sezoen.
Op d'n derde zaoterdaag van november organisere weej ein zitting tièdes welke ut zittende prinselikke trio aaftraejt en plaatsmak veur ein niej dreejspan. Deze mak, zoas al ièrder gezag, dreej waeke veur de vastelaovend eur opwachting in alweer ein fiëstelikke zitting.
Daornao geit ut pas ech beginne: ózze eige vastelaoveskrant wuurt gepresenteerd en d'n ièrste krant wuurt oétgereik aan éin of eine groep Venlonaere waorvan weej vinde det zeej ein positieve beejdrage aan de stad Venlo hebbe geleverd. Vervolges bezeuke weej de recepsies van ós zustervereiniginge, fleure weej ut "kerrebal" (gehendikepte kinder) en ut alum bekinde "spruutjesbal" op, bezeuke weej de Venlo-Zuudse schoële en organisere ein zitting veur de seniore in de Sinselhaof. Op zaoterdaagaovend veuraafgaond aan de vastelaovend, neme weej met ós collega's van Boéte de Paort deil aan de Vastelaovesmis in ós eige O.L. Vrouwe Kerk.
Wae dink det weej dan klaor zien haet ut mis: op vastelaovesmaondaag um 11.00 uur zien weej al weer in de weer met de moëdesjoow tiédes welke de Venlo-Zuidse jeug eur vastelaovespekskes kinne sjoowe aan ein deskundige zjurie. Daornao löp ein groeët deil van ut gezelschap mei in de Venlose optoch. Op vastelaovesdinsdaag gaon weej met z'n alle "krense" beej ut boérebroélofgezelschap en sloéte we um 24.00 oor de vastelaovend officieel aaf.
Veurwaar gén programma um gemekkelik euverhaer te stappe!
De toekóms
Wae de jeug haet, haet de toekóms. Det haet De Kwas auk begrepe, daorum zien weej in 2002 ein jeugaafdeiling gestart. Eine groep jeugdige "vastelaovesgekke" is ónder auspicie van inkele volwassene vol enthousiasme begônne met ut organisere van eine jeugbal tiédes welleke auk inkele artieste eur opwachting makte.
In 2004 woort de volgende stap genaome met eine komplete raod van elf, ein jeugtrio en alles wat daobeej hoort. De Kwas haop en meint heejmei nieje aanwas en jeugdig elan aan ut gezelschap toe te voege.
Interesse?:
Haet baovestaonde oéteinzetting óg interesse gewek en wilt geej gaer Vrind van de Kwas waere ? Det kan! Gank dan snel naor: http://www.dekwas.nl/vrind-waere/
Veur mier informasie kint geej terech beej ózze
| penningmeister | of | veurzitter |
| Claudia Clabbers | Sander Driessen | |
| Zwanenstraat 90 | Hendrikxstraat 19A | |
| 5912 TG Venlo | 5912 CD Venlo | |
| Tel.: 077-4633905 | Tel.: 077-3518604 |