Veurige waek Maondaag zien we as dreejspan begonne aan eine slinger van activiteite, met hielvuul hoëgtepunte. Ut begos allemaol met ut fortissimo concert. Vervolges hadde we in die waek nog vergadering, ziekebezeuk, bezeuk aan Sinselhaof, seniorezitting en bezeuk aan de schoële Zuidstroom en De Koperwiek.

Vriedaags (vastelaovesvriedaag al geneump in de wandelgangen) hadde we ôs eige recepsie. Op zonne aovend geit ut dan ech los veur ôs. Wat ein gezellige sfeer, wat ein joeks in dae zaal, waat ein minse. Ut waas ein fantastische recepsie. Weej hebbe genaote van alle weurdjes, van alle felicitaties en we zulle nog lang geneete van alle kedoos. Aan idderein ein volmondig BEDANK!

Zaoterdaag’s hebbe we in hoeselike sfere genaote van de Boëte zitting en zien vervolgens weer op paad gegaon. Iers bezochte we “De Wendel”. Wat is det toch heerlik um te zeen wie ze daor geneete van dae vastelaovend. Daornao zien we verder getrokke naor de Scouting en hebbe meuge meigeneete wie eur Trio oétkwaam en hebbe vervolges gefeliciteerd. As letste stond ut Bellebal op ut programma dae aovend. Heerlijk dae vastelaovend opstarte. De bein die woele eigenlik neet mier, maar bliekbaar hebse altied nog eurges ein reserve, wao se dan auk ech gebroek van maks. In de late (vruuge) eurkes hebbe we aafgeslaote en efkes os op ein uurke gelag, want Zondaags woord ut weer eine vruuge. De kinderoptoch hebbe we as dreejspan meigelaupe met os eige jeug.

Auk hebbe we ôs eige jeug ondersteund beej eur bezeuk aan de recepsie van Jocus toekoms. 's Moandaags begoste we de daag met os traditiegetrouwe moëdeshow. Kinder bezeuke ôs in eur moëiste pekske. Van 0 wies 15 jaor ald, we hebbe de kinder meuge bekieke en ik mot toch waal zegge det daor hiele moeie pekskes beej leepe. De jury haet ut ech neet mekkelik gehad! Nao de moëdeshow hebbe we os klaor gemak veur de optoch deilname.

De Kwas löp idder jaor mei in de optoch van Venlo. En ik mot zegge det ut weer heerlik waas. Jao ut waas kald, maar met ein dröpke oet de fles en lekker springe en danse op de meziek, woord ut al gauw werm. Auk nao de optoch zien we "aafgezak" nao os residentie Ut Tref en hebbe dao nog wies de laate eurkes os lekker laote gaon.

Dinsdaag’s, gaon de uigkes weer aope, maar dan al direct met ein ander geveul. Ik trek de smoking oet de kas en mich bekruup ein geveul van “tis de letste kier det ik det aantrek”. Natuurlik weit ik det ik det straks in November nog twie kier aantrek…maar toch. Ik trek mich aan en we vertrekke richting Ut Tref. Heej hebbe we iërs lekker ontbeete beej Huub en Toos. Ein heerlik ontbijt stond klaor en det zörg veur eine gooije baom. We vertrekke naor de Maaspoort wao we ôs felicitaties bringe aan ut broedspaar van de boerebroelof.

Heejnao hadde we “vreej zwumme” en zien lekker van kefeeke naor kefeeke getrokke. As ut dan duuster wuurd boete, dan geise langzaamaan efkes uerges zitte um wat te aete. En dan gebeurd ut alweer. Ein moment van rös waarbeej se geis naodinke van …sjips… nog maar zes eurkes. We zakke weer aaf richting os residentie Ut Tref, wao we traditie getrouw de vastelaovend aafsloete tesaame met ôs jeug. Dan steise in dae zaal en dan kiekse op die klok ... nog maar 4 oor ... nog maar 3 oor ... Ôs eige jeug duit eur aaftraeje op de buhne. Princes Maud en eur adjudante Pascale en Rachel levere eure scepter en eur kroën en kiepskes in ...slik... Dames, ut waas eine fantastische tiëd met och. Wat hebbe we saame gelache…BEDANK!

Dan gaon weej naor baove met de ganse raod. Ein weurdje van ozze Vors zet metein de juuste toën beej mich, slik. Euver ut aafsloëte kin ik nog maar ein dink zegge; “Zonne geweldige, moeie vastelaovend heb ik nog noeïts meigemak. Ik zoel ut gaer nog doezend kier meimaake ... maar zoe zal ut noeïts mier zien. Ut waas einmalig ... ens en noeïts mier ... Mien hertje leet beej De Kwas en natuurlik bin ik weer gauw te vinde in ozze TC kelder. De Kwas, Eine groëte groep vrinde ... jao ... kammeraode. Idderein dae met ôs gefees haet, idderein dae saame met ôs joeks en jen haet gemak, idderein dae op welke meneer dan auk haet meigeholpe aan dees fantastsche waeke

BEDANK! UT WAAS AAF!

Snik snik.