De aktuele nog steeds hoeëge besmettingsciefers, de ónophaldelikke drök op de zörg, maar zeker ouk de sómbere verwachtinge veur de ierste waeke van ’t niej jaor as gevolg van de Omicron-variant, laote ós daoin gen andere keus. Óndanks det weej det gaer anders hadde gezeen, veule weej de verantwoordelikheid um deze knoup noow same door te hakke en duúdelikheid te gaeve aan alle vastelaovesvierders in Venlo. Weej hadde taege baeter weite in dit besloet nog langer kinne oetstelle, maar hebbe dao neet veur gekaoze. Vastelaovesvierders in Venlo en Blierick hebbe rech op ’n aope, ierlik en tiedig berich. 

Konkreet beteikent dit det weej gen Prinse zulle oetrope, det d’r op vastelaovesdinsdaag gen boerebroelof zal zien op ‘t Stadhoes, gen zittinge, recepties of bals zulle zien en det d’r ouk gen traditionele optochte waere georganiseerd.

Beteikent dit det d’r kómmend jaor genne vastelaovend is? Nae, d’r is zeker waal vastelaovend, aevel zal dae -as de situatie ’t dan toeluuet- veur ‘n groeët deil óngeorganiseerd en kleinschalig van karakter zien. 

’t Sprik veur zich det weej alle óntwikkelinge naodrökkelik blieve volge en as de situatie dao taege dae tied ruumte veur luuet, same mit alle vastelaovesgekke in Venlo en Blierick ós rol en verantwoordelikheid pakke binne de meugelikhede van det moment, mit respek veur ós traditie.

Ós vastelaoveshert bloojt, aevel de algemeine volksgezóndheid en veiligheid van minse is veur ós ‘t allerbelangriekste. En bedink: van alle ónbelangrieke dinger is vastelaovend ‘t belangriekste. 

Names Venloosch Vastelaoves Gezelschap Jocus en Vastelaovesgezelschap De Wortelepin en alle zier gewaardeerde Zustervereiniginge in stadsdeil Venlo, te weite: V.V. Boëte de Paort, V.V. De Gaaskaetel, V.G. De Kwas, V.V. De Moeraskwaakers, V.G. De Törvers, V.G. De Vaegers, V.G. De Vogelhut en V.V. De Wien

Baovestaond besloet is aafgestump mit ’t Boerebroelofgezelschap van Zomerparkfeest