Ut weer van de aafgelaupe daag haet ôs weer efkes veuroét doon kiëke. De herfs is oétintelik dan toch begôs en donkere aovende staon ôs weer te wachte. Auk ut vastelaovescircus van "de Kwas" geit weer beginne.

Ut motto veur ut nieje vastelaovesseizoen is door ôs ideejekemmissie bekint gemak. Onder ut motto Hoëggeiëërd publiek prissentere weej ôs aan de luuj in Venlo-zuid door o.a de versiering van de zaal en de pekskes van d'n optôch.

Zaoterdaag 20 oktober a.s. zal d'r weer ein kienaovend gehalde waere in ôs Kwasteresidensie "ut Tref" aan de Hendrikxstraot. Vanaaf 19:30 oor waere de walbekinde nummerkes weer op professionele wiès opgelaeze en zien d'r leuke prièze te winne.
Noteer auk alvas de volgende kiendata in ôg agenda: 10 november en 22 december.

Auk dit jaor verkaupe weej vanaaf 11 november aan ôg de officiële Opstaeker. Veur €5,- zien ze te kaup beej Fried Driessen of Claudia Clabbers.

Zondaag 11 november trekke weej d'r weer op oét um op de merret veur ut stadhoés de vastelaovend in te scheete.

Weej nuüdige ôg van herte oét um det same met ôs te komme doon. Ut programma begint um 11:11 oor.

Vastelaovesgezelschap "de Kwas" organiseert same met mèziekvereiniging "Valuas" de twiëde edisie van 't Galderbal.

Nao ut sukses en de euverweldigende positieve reaksies op de iërste edisie, vindt zaoterdaag 24 november de twiëde edisie van 't Galderbal plaats in Feeszaal "ut Tref".
Deze gratis toegankelikke aovend kenmerk zich door unne interactieve mix van toniël, zang, dans en ein grande setting van mèziekvereiniging Valuas.

Laot ôg meiveure nao d'n alde tiëd van ut Patroonaatje door de schoëne klanke van "Valuas". 
Vaerder traeje veur òg op: Marcel Verdellen en Paul Joosten, Frans Driessen, Joekskoër Maasbree, Marco Schell en ein spetterende aafsloéting van Feesband Pats!.

"De Kwas" zal op ein hertverwermende wiéés aafscheid neme van Prins Rob d'n iërste en zien adjudante Mark en Ramon die zich ut aafgelaupe vastelaovesseizoen fantasties geprissenteerd hebbe aan de minse in Venlo-Zuid.

Weej bestaon dit vastelaovesseizoen 11 jaor. Dit laote weej netuurlik neet ongemerk aan ôg veurbeej gaon. D'r zulle ein aantal activiteite georganiseerd waere en weej zulle auk nog op ein unieke manier beej ôg op de deurmat valle.

Vaerder hebbe weej aafgelaupe maond meigedaon met de Clubspaaraksie beej Jan Linders. Weej hebbe dao de twiëde priés behaold en ein cheque euverhandig gekrege van €749,-. Idderein bedank dae ôs ein werm hert haet toégedrage.

Weej zien auk nog op zeuk nao nieje aanwas beej de "Jeug van de Kwas". Kint geej eemus binne òg femilie- of kinnissekringk met affiniteit veur joeks en jen en wilt geej wat mier weite, steur dan ein mailtje nao John Jacobs, jcmjacobs@home.nl.

Zondaag 2 september j.l. woort d'r weer unne gezellige femiliedaag georganiseerd door ut BFG-kommitée. Onder ut genot van zelf meigebrachte aeteswaar genoot idderein van ein heerlik ontbijt in ut Julianapark. Daonao waas d'r sport en spel op ut terrein van de Meulewiekers met as aafsloéting eine heerlikke barbecue.

Tièdes deze BFG-daag woort d'r auk aafschied genaome van 6 leeje die ut aafgelaupe seizoen gestop zien. Dreej hière woorte nog efkes speciaal in ut zunke gezatte door beneump te waere tot "Lid van Verdeenste". Dees iër kwaam toe aan d'n hiër Peter Loosveld, d'n hiër Louis Lammen en d'n hiër Jan Peeters.

Eine verkleijde balaovend op zaoterdaag 19 jannewarie 2013 vol met mèziek en zang, ut oètkomme van ut nieje trio van "de Kwas".

De artieste zulle stapsgewiès kinbaar gemak waere, maar wae d'r al dökker beej is gewaes haet al Minsekinder, Beppie Kraft, Frans Theunisz, Ben Verdellen, Frans Pollux, Sjraar Peetjens en vuule andere op de Kwastebühne zeen staon. De muzikale begeleiding is, zoe wie idder jaor, in hande van M!xx (Jocus Hofkepèl)

De aovend begint um 20:11 (zaal aope vanaaf 19:30) en vindt plaats in de Kwasteresidentie Keffee/Feeszaal "ut Tref" aan de Hendrikxstraot te Venlo-Zuid. Entree nog altied GRATIS!

De volgende niejsbreef ontvingk geej in de derde waek van november.

Vastelaovend in Venlo-Zuid.
Dét is de Kwas!