Vriedaagaovend 10 fibberwarie zal ut hoésorgaan van "de Kwas", de Kwastekrant, weer geprissenteerd waere. Aan deze krant wuurt door idderein binne "de Kwas" hard gewerk door ut binnehaole van de advertenties en de stökke teks, onder leiding van de Pers & Propagandakemissie.

Idder jaor is ut ein gebroek um de iërste Kwastekrant oét te reike aan ein gezelschap of vereiniging welke det jaor jubileert.
Dit jaor haet "de Kwas" gekaoze um stil te staon beej 100 jaor Boérebroelof in Venlo. Vanwaege dit jubileum is ut de iër aan ut Boerebroelofsgezelschap van dit jaor, de Femilie Pollux, zoë auk aan de AZ kemissie van Jocus um de iërste Kwastekrant in ontvangs te meuge neme.

De krantoétreiking vindt plaats in ôs residensie Feeszaal "ut Tref". Idderein is van herte welkom vanaaf 19:30 oor. Muzikaal wuurt deze aovend opgeluusterd door Joekskepèl "Schöd um Laeg".  

Zaoterdaagmiddaag 11 fibberwarie wuurt ut nieje trio van "de Jeug van de Kwas" ein recepsie aangebaoje in ôs residensie.

Prins Jeer d'n iërste en zien adjudante Joep en Patrick zulle vanaaf 14:00 oor op de Kwastebühne staon um ôg felicitasies in ontvangs te meuge neme.

Sins ein aantal jaore organisere weej met sukses ein Seniorezitting in "ut Tref" op de woensdaagaovend veur de vastelaovend. Deze aovend steit vol met buut, zang en dans. De zaal zit idders kiër good gevöld met minse oét de wiék.

Doordet ut vanaaf de iërste edisie al metein duudelik waas det de doelgroep waat jônger oétveel as gedach en umdet weej door de kôms van ôs Galderbal gen Prônkzitting miër hadde, hebbe weej beslaote um van de Seniorezitting ein Prônkzitting te make.
Ut program dit jaor luug d’r auk neet um. Geej waert deze aovend getrakteerd op optraejes van Peter Wilders, Joekskepèl "Zoeë is ut laeve", René Drüke, Rob Deenen, Luc Stikkelbroeck, De aolieneutjes, Fer Naus, Trio ongeplök, Hay Smeets, Pierre Cnoops en de Kammeräödjes.

Ein vol program vol joeks en jen en zoeäs ut "de Kwas" betaamp heb geej vreeje entree.  Heb geej zin in eine gezellige aovend laup dan röstig binne en neem plaats in ôs tropisch paradiés!

De aovend vindt plaatsop woensdaag 15 fibberwarie in ôs residensie "ut Tref" en begint um 19:30 oor. Deure zien geäöpend vanaaf 18:45.

Vriedaag 17 fibberwarie wuurt ut trio van "de Kwas" ein recepsie aangebooje in ôs residensie Feeszaal "ut Tref". Dees recepsie aan de veuraovend van de vastelaovend wuurt altied drök bezoch neet allein door de verschillende zustervereiniginge maar auk door de minse oét de wiëk.

Geej kint Prins Rob d'n Iërste en zien adjudante Mark en Ramon fellicitere vanaaf 20:11 oor.

Vastelaovesdinsdaag 21 fibberwarie sloéte weej de vastelaovend aaf in ôs stadsresidensie "De Blauw Trap" aan de Alde Merret. Idderein is van herte welkom vanaaf 20:00 oor waonao um 11 minute veur negede vastelaovend officieël wuurt aafgeslaote door beej ôs trio de mutse aaf te zette.

Vastelaovendgezelschap "de Kwas" wins ôg unne joeksige vastelaovend. We zeen ôs gaer truuk beej ein van ôs aktiviteite.

Vastelaovend in Venlo-Zuid.
Dét is de Kwas!