Vanaaf d'n Elfde van d'n Elfde kint geej auk beej ôs terech um de Opstaeker te kaupe. Spraek ein lid van ôs gezelschap aan en steun "de Kwas".

Vastelaovesgezelschap "De Kwas" organiseert same met mèziekvereiniging "Valuas" zaoterdaag 23 oktober de derde edisie van 't Galderbal.

Deze gratis toegankelikke aovend kenmerk zich door eine interactieve mix van toniël, zang, dans en ein grande setting van mèziekvereiniging Valuas.

Laot ôg meiveure nao d'n alde tiëd van ut Patroonaatje door de schoëne
klanke van "Valuas".
Vaerder traeje veur ôg op: Noud en Tim, Bert en Herm Pollux, de Kompane, Roel Verberkt en Bart Janssen en ein spetterende aafsloéting van Feesband Pats!.

"De Kwas" zal op ein hertverwermende wiés aafscheid neme van Prins Arthur d'n iërste en zien adjudante Auke en Bas, die zich ut aafgelaupe vastelaovesseizoen fantasties geprissenteerd hebbe aan de minse in Venlo-Zuid.

Nao maonde van veurbereidinge op de achtergrond is ut dan intelik zoë wied. Ut Boerebroelofsgezelschap van de Kwas zal zich vriedaag 29 november aan ôg prissentere. Dit zal gaon gebeure in twië fases.

Ten iërste ziet geej, same met de bewoëners van Venlo-zuid en ein aantal genuëdigde, oétgenuëdig um gezamelik, taege ein kleine vergoeding, ein hepke te aete (ein luxe boerebuffet met verschillende soorte vleis veur de priés van € 8,- p.p. opgaeve via info@dekwas.nl).

As sloétstök zal umstreeks 18:30 oor ut boerebroelofsgezelschap as iërste zich aan ôg prissentere. Geej heb dan dus de primeur! Daonao is d’r de meugelikheid um truuk te kiéke op ut iërste optraeje en veuroét te kiéke op ein geweldig, bizonder en historisch seizoen waat ôs in ut veuroétzich leet.

Um 20:00 oor make weej ôs klaor um ut boerebroelofsgezelschap van de Kwas aan gans Venlo te tuëne. Weej gaon daoveur naor de stad wao weej van de Venlonazaal aan de Hoëgewaeg einmaolig ein enclave make van ôs eige Venlo-Zuid.
Dao zal um 21:11 oor de wiéze Raod van Elf symbolisch de mach veur ein jaor euverdrage aan ut boerebroelofsgezelschap. Dit alles onder auspiciën van de wiéze Raod en AZ-kemmissie van Jocus.

Netuurlik zal dit ein aovendvullend programma zien waobeej de muzikale begeleiding van de aovend in hand is van MIXX (Jocus Hofkepel). Vaerder waere de 4 winnende leedjes van Opus Jocus ten gehuure gebrach en zien d’r optraejes van NUATH en W-dreej.

Deze aovend is gehiél in stiél van de Kwas: entree vreej!