Vastelaovesgezelschap "de Kwas" haet in ut beejzien van (alt)leeje, (alt)adjudante, (alt)Prinse en vrinde van de Kwas ut boerebroelofsgezelschap van 2014 bekind gemak.  

Op ut bordes van ut stadhoes zulle op 4 maart 2014, in ut beejzien van femilie, getuuge, börgemeister, bode en netuurlik hiel vuul andere Venlonaere, Loes Peters en Evert Schnock met elkaar in d'n onech waere verbonde. 

Broed en broedegom zien actieve leeje binne de Kwas. Loes is lid van de Jeugkemmissie en Evert is veurzitter van de Pers & Propagandakemmissie. 

Auk alle andere rolle woorte bekind gemak. Geej kint ze heej bekieke. 

Zôndaag 9 juni zulle weej, as iërste boerebroelofsaktiviteit, boeremoos gaon paote in de Venlo-zuidse grônd. 

Beej ut viere van de Boerebroelof huure tradisies. Zoë auk ut boeremoospaote door ut Boerebroelofsgezelschap veuropgegaond door ut broedspaar en ein aafvaardiging van Jocus. 

Dit jaor zal de boeremoos gepaot gaon waere op ein stök land aan de Wittendiékwaeg in Venlo-zuid. 

Geej ziet van herte genuëjd um same met ôs ut stök land good vol te paote. 

D'r wuurt um 10:30 verzameld beej "ut Tref" waonao weej met de ganse koedeljach onder muzikale begeleiding van Joekskepèl "Och Nae Toch" in ôptoch nao de Wittendiékwaeg zulle fietse. 

De route is as volg: Hendrikxstraot, Kortestraot, O.L.Vrouweplein, Saxenkampstraot, Genbroekstraot, Ibisstraot, Zwanestraot, Reigerstraot, Waterhoenstraot, Kraanvogelstraot, Hagerhofwaeg, Meerkoetstraot, Hagerlei, Wittendiékwaeg. 

Sloét ôg gerös aan!