Maar waat hebbe weej genaote, ut waas geweldig ut waas aaf!!!

In ein good gevölde Hoonderstal met ein kleine 2000 Boere en Boerinne kwame wej as niej boerebroelofsgezelschap van de stad nao binne. Weej woorte hertelik welkôm geheite door Vors Joeccius XI en zien wiéze raod, waonao weej ôs veur al die minse zelf veurstelde op ut Holladiejee.

Ut leep wie nog niej en gans de stad haet kinne huure det weej binne ôs kleingezelschap hiel wat bühne ervaring hebbe zitte met al die ald Prinse en Adjudante. Naodet de ringe um de vinger ware geschaove waas ut de iër aan Evert en Loes um de äöpeningsdans te doon en woord offisjeel ut Boeremoosbal geäöpend.
Veur ut gezelschap de gelaegeheid um te piére te waaije en te klasjenere.

Umdet auk weej op de kleintjes môtte lette woort gezörg det d’r wat pekunia in ut laejke kwaam door verkaup van merchandise. Heb geej nog genne sjaal of boerezakdook? Spraek dan ein van de leeje van de Kwas aan, zoëdet dae det veur ôg kin regele. De Pinkes zien helaas waeges groet sukses al op!!!

Nao wat weinig nachrös woorte weej al weer vruug verwach veur ut schmienke en ein echte balkônscene waobeej ut broedspaar vanaaf ut balkon van Central woort toegezônge door ôs zustervereiniginge en d’n erme tak. Van daoroét met zien alle nao de Maaspoort wao truuk woort gekeke op ein geweldig bal en de verloving van ôs Broedspaar.
Hiel wat minse kwame eur de hand drökke en winst ôs vuul lol en plezeer de aankômmende tiéd.

Lol en plezeer gaon weej zeker kriége in de drökke tiéd dae now veur ôs steit. Weej beginne ut aankômmende waekind zaoterdaag 8 fibberwari al met ein feesje in ôs eige residensie. Ut Pallesaotebal! Ein bal zônder niéje Prins maar waal met ein prissentasie van ôs eige Boerebroelofsgezelschap. Met natuurlik ein geweldig programma!! Miër informasie vindse op www.pallesaotebal.nl

Zoë bringe weej Vastelaovend veur ôs eige Venlo-Zuid, maar dit jaor auk veur gans de stad. Weej haope ôg dan auk te zeen, zoédet weej met ôg de iërste indrökke van de iërste waek Boerebroelofsgezelschap kinne deile. Weej zeen ôg dan auk gaer in ut Tref aan de Hendrikxstraot.