|
Wat andere jaore eine aovend vol spanning waas met de grutste vraog wae de nieje Hoëgheid van V.G. de Kwas zoel waere, woort now eine gezellige aovend met Joeks en Jen. Weej kinne dan auk zegge det zoë de vastelaovend bedoeld is en det gewoën in ôs eige Venlo-Zuid!!!
Maar wat wilse auk met zo’n entourage, de Technische Kemissie van de Kwas haet zich oét de naod gewerk um in eine zaal te laote zeen wat weej de aafgelaupe 55 jaor zoëal gedaon hebbe. Dit waas natuurlik truuk te zeen in det “kleine” fotorölke waat gans naeve de moor van ut Tref leep met waal hônderd foto’s d’r op, Trio’s, sfeerimpressies en neum maar op. Umdet d’r in ut verleeje zunig met versiering woort umgegaon en men zich altiéd bedach det d’r misschiens nog waal ens wat gebroék kôs waere. haet de TC hiel veurzichtig eine blik gewórpe op de zölder van ut patronaat en zoë ein ganse lading rekwisiete van stal gehaold, dit alles ônder ut môtto: “Wat vluug d’n tiéd”. Aasof det neet allemaol genôg waas haet ôs sponsorkemissie Elian van Party Service Venlo bereid gevônde um de zaal tot in de puntjes die extra sfeer van vastelaovend te gaeve met zien ballônneslingers.
Det al is nog maar ut begin! Eine topaovend met MiXX die in eur sessies ut daak d’r haos aaf speulde met ônvervalste vastelaovesleedjes en lekkere meizingers, de 4 winnende leedjes van Opus Jocus kwame veurbeej en later op d’n aovend nog efkes wengske aan wengske met Ben Verdellen. As det nog neet genôg is natuurlik ein optraeje van ut Boerebroelofsgezelschap en de begeleidingskapel van dae aovend NUATH goof laat op d’n aovend ein toegift wao de tent gans van op de kop ging staon.
Eine geweldige aovend zônder nieje heersers euver ut Kwasteriék maar waal met ein Boerebroelofsgzelschap wao geej nog dök van gôt huure!
Musea
Zoë wie net al efkes beschreve liék ut Tref waal ein Kwastemuseum. Um dit museum te bezeuke vraoge weej te kiéke nao de äöpeningstieje op ôzze site, www.dekwas.nl en www.boerebroelof.nl dao staon alle äöpeningstieje op beej al ôs aktiviteite. Want ôndanks det weej de Boerebroelof organisere bliéve weej waal volhalde aan tradisies, weej organisere gewoën veur de inwoëners van Venlo-Zuid ôs eige aktiviteite dus kôm gerös binne beej:
- Ut Mini-Pallesaotebal met ut oétroope van ut nieje Jeug-Trio, aankômmende zaoterdaag 15 fibberwari
- Krantprissentasie van de BoereKwa(t)s aan Vg. De Vogelhut op vriedaag 21 fibberwari
- Resepsie van ôs Jeug-Trio op zaoterdaag 22 fibberwari
- Groëte prônkzitting op woensdaag 26 fibberwari
- Groëte resepsie van ôs Broedspaar, die zeej aangebaoje kriége van eur ônechte elders op vastelaoves vriedaag 28 fibberwari
En as geej dan nog genne tiéd heb gehad, kôm dan naor ôs Bellebal op vastelaoveszaoterdaag wao weej tradisjoneel um klokslaag 12.00 oor in de nach de vastelaovend offisjeel begroete en viere. Kortum genôg meugelikhede um ôs Kwastemuseum te bekiéke.
|
