Op ein good gevöld Mini-Pallesaotebal is zaoterdaag ut elfde dreejspan van de Jeug van de Kwas oétgerope.
De woute van ut Boerebroelofsgezelschap hadde eur werk good gedaon en hadde eine deef gevange in Venlo-Zuid, dae aan ut schoepe waas. (Eindelik woute, die gewoën weer boeve vange!)

Hae had eur verteld, det hae nog hard nuëdig waas beej ut Mini-Pallesaotebal, umdet hae dao de Jeugvors van de Kwas meus helpe. Dus woort daen deef door de woute opgebrach in Ut Tref. Daen deef euverhandigde Jeugvors Kwastius eine sleutel wao hae ein muziékdeur mei aope kôs make. De Vors vônd dao dreej persoëne, die hae mei noom op de bühne en die hae veurstelde as zien elfde dreejspan van de Jeug van de Kwas.

Prinses Rianne (Delvaux) ut Iërste met eur
adjudante Sjuulke (van der Klij) en Britney (Groenheijde).

Naodet eur de mantels ware umgehange en ze eur regalia hadde ôntvange, hebbe ze met de Jeug van Venlo-Zuid vastelaovend gevierd, met tal van artieste en ônder muzikale begeleiding van Hölster Heinke.

Ut zien dreej Venlose maedjes diej zich kinne van de liëgere schoël en al waat ervaring hebbe opgedaon met de vastelaovend as dreejspan. Zoë ware Rianne en Britney adjudant van de Hoëgheid van vurrig jaor Jesaya op ut Spruutjesbal.
Rianne en Sjuulke zörge veur de muzikale toën in ut dreejspan, want ze zien lid van Fortissimo en van muziekvereiniging Valuas. Taevens hauwe Rianne en Britney ein aardig belke beej de Tegelse hockeyclub. En met de artistieke invloed van Sjuulke vorme ze same ein geweldig dreejspan um dit jaor veur op te gaon beej de Jeug van de Kwas.

Waat is d’r fijner as ein gezelschap intelik gans kompleet is? Ut is nog fijner um dan same op paad te gaon. Same in alle vruugte verzamele um naor de stad te trekke um dao in Jocus Hoonderstal de nieje stadsprins Jaques-Paul de 1^ste en zien adjudante Geert en Ikar te gaon felisitere.

Iërs ut Boerebroelofsgezelschap van de Kwas en naodet weej tössedoor ôs stadsresidensie Blauw Trap offisjeel in gebroék hadde genaome ware de Raod en de Jeug van de Kwas aan de beurt.

Heejnao stônd ein gezamelik aetentje op ut programma met de ganse Kwastefemilie; Leeje, dragers Extra Hoëge Onderscheiding enLeeje van verdeenste allmaol met eur Partners en thoés woënde kinder.

Met 133 persoëne aan taofel veur ôs Hofdiner in ôs eige residensie. Daobeej waas d’r aandach veur ôs gezelschap maar nog miër veur de 11 leeje die gehöldig woorte veur eur vuulvoud van 11 jäörig lidmaatschap.

Zoë woorte gehöldig veur 11 jaor lid; Jeroen Dael, Marco Jacobs, Lars Hocks, Loes Peters, Sander Geurts, Roel Bottenberg, Paulina Worek, Iris Jacobs en Ester Peters.

Veur 22 jaor lidmaatschap Mario Alberts en veur 33 jaor Fried Driessen.

Zoë zeet geej maar weer: beej de Kwas bisse gaer!!! Auk dét is de Kwas.