Jeug van de Kwas

Hé dich dao! Tóf desse kumps kieke op ózze thoespagina!

Wae zien weej?

Weej zien de Jeug van De Kwas, bestaonde oet de jeugraod en de garde. 

Ós historie

In 2002 woort d'r ónderzóch of d'r waat mier beteikent kós waere veur de jeug oet Venlo-Zuid. Inkele ideje kwame op taofel en al gauw bleek det d'r waal animo waas um waat mier te doon met de jeugvastelaovend, zoeëdet 't neet nao 't Spruutjesbal gedaon waas.

Inkele jeugdige vreejwilligers oet Zuid startte in 2003, same met inkele Kwasteleje, met 't organisere van 'ne jeugmiddaag. D'r kwaam vanalles beej kieke um dae middaag van de grónd te kriege. Zoeë woort d’r driftig nao artieste en joekskapelle gezóch en d'r woorte zelfs posters gemak. Ouk leech en geluud woort door de jeug zelf geregeld.
Ut lökde eur um dae middaag op de plenk te kriege. Waat ware zeej grueëts nao dae ierste jeugmiddaag!

Dit succes bleek nao mier te smake en dus woort beslaote um vanaaf 't seizoen 2003-2004 met 'n trio, raod van elf, tanzmeriekes, vors en sirremoniemeister 't begin te make van de Jeug van De Kwas. De Kwas zelf stond d’r ouk volledig achter en steunde de blage met eur ervaring. Vuuel werk meus d’r verrich waere. Gelökkig ware d’r elders die ouk 'ne helpende hand oet stoke. Zoeë woorte d’r pekskes veur de tanzmeriekes en gilletjes veur de Raod van Elf gemak.



Waat waas 't spannend det ierste, echte, jaor um die vastelaovesbühne op te gaon. D'r ware d'r beej die stónde stief van de zenuwe beej ut oetkómme van 't ierste jeugtrio in 'ne volle Kwastetempel gevöld met jeug oet de wiek. 

Same wuuert d’r idder jaor gewerk aan ein nie jeugbal veur en door de jeug oet zuid. De letste jaore ónder de naam: Mini-Pallesaotebal.

Vanaaf 't seizoen 2013-2014 is d'r zelfs weer 'n dansgarde ópgerich.

Um met de jeug in Venlo-Zuid vastelaovend te viere, steit beej De Kwas hoeëg in ut vaandel en weej met de Jeug van De Kwas zulle dao ein beejdrage aan blieve levere. Al haet de jeug van taegewaordig vueël andere dinger te doon, toch blieve we haope det de cultuur van de vastelaovend blief bestaon. En det d’r nog steeds blage zien, die de vastelaovend met de paplaepel hebbe binne gekrege en met ós vastelaovend viere.

Vastelaovend in Venlo-Zuid veur de jeug, door de jeug.

Klik heej um kóntak met ós op te neme.