Aafgeloupe vriedaag 6 fibberwari is d’n hier Evert Schnock gedecoreerd met de Extra Hoeëge Ónderscheijing van Vastelaovesgezelschap De Kwas.
Dit gebeurde tiedes de oetreiking van d’n ieërste Kwa(t)s aan ‘t Bewoeënersnetwerk Venlo-Zuid.
Ózze Vors had de zwaore taak um die haos indeloze lies van dinger die hae gedaon haet veur De Kwas same te pakke in ‘n schoeën präötje.
Evert sloot 20 jaor geleje aan binne de commissie Pers & Propaganda wao hae zich metein vasbeet in ‘t oet d’n aek dreije van van einen balaovend, dae we noow kinne as ‘t Pallesaotebal. In korten tied stoumde hae wier van aspirant lid, nao lid van De Kwas, via vice veurzitterschap, nao veurzitterschap van P&P.
De Kwastekrant van toen kwaam ónder zien verantwoordelikheid en de toenmalige glossy puilde al rap haos oet van de advertenties, dus woort d’r ouk geadverteerd op televisie beej d’n umroop.
De P van propaganda kreeg ónder dien bezielende leiding pas éch inhald met borde langs de waeg nao ‘t Pallesaotebal, flyers en sociale media. We krege Vrinde van De Kwas, die idder jaor ‘n schoeën pinke kriege in thema.
Ouk woort d’r gewerk aan de herkinbaarheid. De Kreet ‘Dét is De Kwas’ woort nog
mier oetgedrage, en dao plökke weej nog altied de vruchte van. Op menig buun hoofs se
maar te rope: “Wie het die schoeëne club oet Venlo Zuid?” En de zaal zal scandere: “Det Is De Kwas!”
En toen ós 55 jäörig jubileum. We krege de BoereBroelof in de slup geworpe. En
Evert deej auditie veur de rol van Broedegóm. En neet zoeëmaar, Evert had zich tot
in de puntjes creatief veurbereid en zong zien eige holadiejeja.
Met Evert as broedegóm kreeg ouk de krant ‘n nie uterlik. ‘T woort ‘ne echte krant en genne glossy mier. Det is de Kwa(t) zoeë as weej dae noow kinne.
P&P is in daen tied dermate groeët gewaore det de sponsortak op eige bein meus gaon staon, det daomei P&R in ‘t laeve woort gerope.
As zien alterego “de Net Neet Prins” richde hae DNN op. Dispuut Net Neet meus taegewich beje tösse ‘t geweld van Ald Adjudante en Ald Prinse. DNN kreeg podium en tiedes de groeëte receptie krieg ‘t trio nog steeds ‘n schoeën kado: De foto van ’t moment supreme op ’t pallesaotebal met neerdwarrelende confetti naodet zeej in vol ornaat veurgesteld ware.
Hae voogde zich beej ‘t stichtingsbestuur van Ut Tref, waas interim veurzitter van de Jeug van De Kwas, vervölt inmiddels de as 2e sikkertaris. Want door regelgaeving en greuj van ós gezelschap is ein góje administratie en einduidige communicatie enorm belangriek gewaore. De rol as veurzitter van P&P is inmiddels euvergedrage, aevel is hae dao nog altied óndersteunend en bereikbaar as vraogbaak.
De man achter hiel vuul veranderinge, waovan d’r heej slechs inkele beneump zien, krieg dees erkinning veur alles waat gedaon is, nog neet beneump is en as aanmoediging veur waat nog kómme geit. De Kwas haet óntiegelik vuul aan Evert te danke.