Optochkemissie

V.G. De Kwas - Kemissie - Optoch Kemissie

De optochkemissie haet as taak um idder jaor eur uterste bes te doon um same met de leje, jeugleje en de Vrinde Van De Kwas, die dao zin in hebbe, ein moeëj kleurriek gehiel neer te zette en te laote straole in  de groeët Venlose optoch. Dit alles is op vreejwilige basis en is ‘n onderdeil van De Kwas maar steit los van budgettaire verplichtinge. Met andere wäörd; duisse mei met de optoch? Dan zien de koste veur dichzelf, maar dich maks ‘n schoeën pekske en dich kriegs d’r ‘ne houp gezelligheid veur truuk! Neteurlik lette weej waal op de pekunia en mot ‘t veur idderein leuk blieve.

Dit alles doon we idder jaor in ’n thema. Idder Kwastelid meug meidinke euver ‘n niej thema en dit kinbaar make tiedes ‘n speciale vergadering, wao idder zien eige idee meug prissentere. Dao wuuert dan gestump en zoeë is ‘t thema veur ‘t aankómmende vastelaovesseizoen gebaore. Dit gebeurt in samewerking met andere kemissies, te weite TC en P&P. D’r wuurt al vreej snel naodet de Vastelaovend aafgeloupe is begós, zoeëdet d’r op tied naogedach kin waere euver de pekskes, wage, de zaalversiering en utinge in de (sociale) media, die allemaol op mekaar zien aafgestump. De versiering van wage en zaal wuurt in euverleg gedaon met de TC, zoeëdet we mekaar kinne helpe en aanvölle wao meugelik.  

‘t Make van de pekskes is gans in eige beheer. Patroeëne waere oetgezóch en geteikend, stóf en accessoires waere gehaold, geknip en tiedig rónd gedeild aan de meiloupende Kwaste en Kweskes. Ein idder dae meilöp zörg zelf veur ‘t make van zien eige pekske. Neteurlik staon weej as kemissie altied klaor um, wao nuuedig, beej te springe. De houfdeksels en eventuele andere accessoires waere tiedes gezellige, gezamelikke knutselaovende gemak.

Op d’n daag van de optoch kómme weej al vruug beejein in ós residentie Ut Tref, um dao de mörfkes te veurzeen van schmink en de letste hand aan de wage te legge. Vervolges loupe weej met de ganse Kwastefemilie nao de Ponywaeg um met d’n optoch door ‘t stedje van lol en plezeer te trekke.

Al met al ’n zier leuke en gezellige kemissie, die ‘t ganse jaor door bezig is.