Meuge weej ós efkes veurstelle?

Meuge weej ós efkes veurstelle?

Weej zien Vastelaovesgezelschap "de Kwas"

Vastelaovesgezelschap De Kwas woort in 1959 opgerich en is daomei 't aldste buurtgerichte vastelaovesgezelschap van Venlo.

Zoeëas idder zichzelf respekterend vastelaovesgezelschap betaamp, rope ouk weej idder jaor eine Prins oet.....(met twieë adjudante).

Dae Prins kump altied oet Venlo-Zuid en is in de regel emus dae zien spaore op ein of andere wies verdeend haet, binne 't vereinigingslaeve.

Weej residere in "Ut Tref" aan de Hendrikxstraot in Venlo-Zuid.

Ós programma:

Weej zien neet allein in de vastelaovestied, maar 't ganse jaor in de weer. De totale organisatie kós vuuel geld en is met allein contributies en donaties neet te betale. Daorum mót d'r hard gekraos waere! Zoeë organisere weej jaorliks kienaovende, haole weej maondeliks ald pepeer op in wiek H ("Vinkeböske" e.o.) en "verheure" weej ós wao meugelik veur barwerkzaamhede tiedes groeëte festiviteite. Ouk bringe weej de wiekkrant rond in Venlo-Zuid.

Ós doel is vanzelfspraekend de aanloup nao de vastelaovend en de dreej dolle daag zelf. Op d'n elfde van d'n elfde neme weej met alle vastelaovesgezelschappe van stadsdeil Venlo deil aan 't inschete van ein nie vastelaovesseizoen.

Op de ierste zaoterdaag nao d'n elfde van d'n elfde organisere weej De Letste X. Heej vindt 't aaftraeje plaats van 't zittende prinselikke trio um plaats te make veur ein nie trio. Det nie trio mak, zoeëas al ierder gezag, dreej waeke veur de vastelaovend eur opwachting op 't gratis toegankelikke Pallesaotebal.

Daonao geit 't pas ech beginne: ózze eige vastelaoveskrant, De Kwa(t)s, wuurt geprissenteerd en oetgereik aan 'ne persoeën of vereiniging waovan weej vinde det zeej 'n positieve beejdrage aan de stad Venlo hebbe geleverd. Vervolges bezeuke weej de recepties van ós zustervereiniginge, fleure weej 't "Kerrebal" (i.s.m Scouting Hertog Reinoud) op, kómme weej tot bezinning in de Vastelaovesmis en organisere weej ós groeëte Prónkzitting op de woensdaag veur de vastelaovend.
Op vastelaovesvriedaag beginne weej al vruug met 't bezeuk aan de Venlo-Zuidse schoeële, prissentere weej ós beej de Vastelaoves Top 555 op de Parade en halde weej 's aoves ós Groeëte Receptie. 

Wae dink det weej dan klaor zien haet 't mis: op vastelaovesmaondaag löp ein groeët deil van t gezelschap mei in de Venlose optoch. Op vastelaovesdinsdaag neme weej um 20:11 oor aafscheid van de vastelaovend in ós stadsresidentie De Blauw Trap. 

Veurwaar gén programma um gemekkelik euverhaer te stappe!

De toekóms

Wae de jeug haet, haet de toekóms. Det haet De Kwas ouk begrepe, daorum zien weej in 2002 'n jeugaafdeiling gestart. 'ne Groep jeugdige "vastelaovesgekke" oet Zuid is ónder begeleiding van inkele volwassene vol enthousiasme begós met 't organisere van 'n jeugbal met optraejes van inkele artieste.

In 2004 woort de volgende stap genaome met 'ne complete raod van elf, 'n jeugtrio en alles wat daobeej hoort. In 2014 stónd d'r ouk weer 'n garde op ós bühne.
De Kwas haop en meint heejmei nieje aanwas en jeugdig elan aan 't gezelschap toe te voege.

Interesse?:

Haet baovestaonde oeteinzetting óg interesse gewek en wilt geej gaer 'n jeurke in de keuke van De Kwas kómme kieke? Klik dan heej um ós 'n mail te steure.

Vrind van de Kwas waere, en zoeë de vastelaovend in Venlo-Zuid meugelik make? Det kan! Klik dan heej.