Vandaag vael d’n hier John Jacobs ‘n zier bezóndere ier toe, wie hae oet hand van ózze börgermeister de keuninklike ónderscheijing móg óntvange.

Zichbaar verras en ónder d’n indrök noom hae ‘t lintje in óntvangs, det symbool steit veur ziene langdurige en bezóndere inzet veur ‘t vastelaovesgebeure in Venlo-Zuid.

John rak beej ‘t vastelaosgebeure in Venlo-Zuid betrokke in 1971, wie hae adjudant woort van prins Martin Christis, zien zwaoger.

Zien betrokkeheid in organisatorische zin dateert vanaaf ‘t mement det zien blage op de basisschoeël zitte in Venlo-zuid en hae dao as groeëte actief wuurd in de organisatie van 't Spruutjesbal; de vastelaovesviering veur de blage van de basisschoeële. Pas inkele jaore naodet zien blage de basisschoeël hebbe verlaote druueg hae dit euver aan andere..

In 2003 ontstónd beej Vastelaovesgezelschap De Kwas ‘t idee om weer ens ‘ne vastelaovesmiddaag te organiseren voor de blage. Activiteite veur de jeug ware juus in de beginperiode van De Kwas ‘n waezelik ónderdeil van de activiteite, aevel waas det in de loup der jaore waat weggezak.

Wie in 2004 dees activiteit woort oetgebreid door heej ouk ‘n officieel jeuggezelschap aan te koppele met jeugraod, vors en ceremoniemeister, dansmarietjes én jeugtrio woort ouk John enthousias en ging as betrokke elder achter de scherme mei helpe.

In seizoen 2010-2011 wuurt hae formeel lid van De Kwas én viceveurzitter van ‘t jeugónderdeil en in 2015 waort hae beneump tot veurzitter heejvan..In 2018 druueg hae ‘t veurzitterschap euver, waobeej hae neteurlik as vraagbaak op d’n achtergrónd aanwezig blief.

Veur zienen inzet óntvink hae in 2019 de Extra Hoeëge Onderscheijing van De Kwas. In 2022 viert hij, as algemein lid, zien 11-jeurig jubileum.

Aan d’n inzet van John zien moeilik aore te koppele. Hae is gennen trainer dae op bepaalde tieje les guuef. Hae is vanaaf de beginperiode ‘n stuwende krach,  dus neet emand dae waat hand en spandeenste verlieënt. Det beteikent det hae meidink, mei organiseert, euverleet met meideorganisatore, jeugleje en elders. Zeker in zó'n beginperiode wie alles nog óntwikkeld meus waere,zal dat vuul tied gekos hebbe. De jeugaafdeiling is in de loup der jaore ouk flink gegreujd en ónder andere oetgebreid met ‘n dansgarde. Daorum is d’r ouk regelmaotig gesleuteld aan de structuur van de jeug.

Met name de kleier veur ‘t jeuggezelschap, aevel ouk de activiteite koste geld. Det wuurd ónder mier opgebrach door ‘t organisere van activiteite waoveur de jeug ouk zelf geld inbrink. Dink daobeej aan acties as de Grote Clubactie of ‘t ophaole van kersbuim..

John kin d’r ouk van genete um zelf actief te zien, zoeë-as beej ‘t oetrope van ‘t nieje trio, verkleid als snieëpóp of as boeteaerds weze, det allein maar zien eige boete aerdse taal sprik.

De meiste werkzaamhede vónde neteurlik plaats in de vastelaovesperiode, vanaaf d’n 11e van d’n 11e, aevel vond John ‘t ouk belangriek det d’r ouk boete dees periode actitviteite oet d’n aek woorte gedreijd..Daorom ware d’r beejveurbeeld spoeëketochte, discozwumme of ‘n film. John haet zier vuul beteikend veur ós gezelschap en dees keuninklike ónderscheijing is dan ouk absoluut op zien plaats beej John!

(Foto's Reinier Linders)