Zaoterdaag 16 november a.s. zulle Linke Mik en Coen Janssen optraeje tiedes De Letste X.

De joeksige Venlose vastelaovesband Linke Mik zoog tiedes de zomer van 2014 't laevesleech en is nimmer weg te dinke van de groeëte Limburgse vastelaovespodia. Wao det zeej optraeje is remmiedemmie gegarandeerd! D'r zal gedans, gesjans en gezónge waere op bekinde vastelaovesleedjes oet groeët Venlo. Det wilt geej toch neet misse!

Wae det geej ouk neet wilt misse tiedes De Letste X is de rasechte vastelaovestroubadour Coen Janssen. Coen geit d'r same met óg 'n ech alderwets gezellig vastelaovesfees van make. Hae geit veurop in de polonaise, zal same met de dansmeriekes 'n denske doon, mak ederein enthousias, kort gezag: Coen zet de zaal finaal op de kop!

Vaerder zal tiedes De Letste X alles nog eine kier dreije um Prins Erik I same met zien adjudante Bas en Cristian. Same kieke weej truuk op eur regeerperiode, veurdet 't letste moment dan toch ech aangebraoke is, det de mutse aaf gaon, de regalia ingeleverd motte waere en de mantels aaf waere gedaon.

De Letste X vindt plaats op zaoterdaag 16 november vanaaf 20.11 oor in Ut Tref in Venlo-Zuid.

De toegank is gratis!